ТОШКЕНТ, 20 авг – Sputnik. Индонезияда бўлиб ўтаётган Осиё ўйинларида Ўзбекистон олимпия терма жамоаси Таиланд устидан ғалаба қозонди, деб хабар қилмоқда УФА матбуот хизмати.
“Ўзбекистон олимпия терма жамоаси Осиё ўйинлари гуруҳ босқичидаги иштирокини якунлади. Сўнгги турда вакилларимиз Таиландга қарши майдонга тушиб, 1:0 ҳисобида ғалаба қозонди”, - дейилган хабарда.
Учрашувдаги ягона голни терма жамоа сардори Забиҳулло Ўринбоев 17-дақиқада киритди. Ўринбоев Алибоев томонидан етказиб берилган узатмани боши билан дарвозага аниқ йўллаб, ҳисобни очишга муваффақ бўлди.
Шу тариқа Равшан Ҳайдаров шогирдлари гуруҳдаги ҳар учта ўйинда ғалаба қозониб, 100 фоизлик натижа қайд этишди. Мусобақанинг 1/8 финал ўйини 23 август куни бўлиб ўтади. Вакилларимиз "А", "С" ёки "D" гуруҳидаги учинчи ўринни эгаллаган терма жамоа билан баҳс олиб боради.
Ўзбекистон олимпия терма жамоаси: Ботирали Эргашев, Рустамжон Ашурматов, Ҳожиакбар Алижонов, Акрамжон Комилов (Аббос Отахонов, 54), Жалолиддин Машарипов, Одилжон Хамробеков, Забиҳилло Ўринбоев, Жавоҳир Сидиқов (Хуршид Ғиёсов, 82), Икромжон Алибоев, Азизбек Турғунбоев (Достон Ҳамдамов, 59), Достонбек Турсунов.
