ТОШКЕНТ, 21 ноя — Sputnik. Халқаро полиция ташкилотига раҳбар этиб Жанубий Корея вакили Ким Чон Ян тайинланди, деб хабар қилмоқда Интерпол расмий Twitter канали. Президент сайлаш маросими Дубайда Интерпол Бош ассамблеясининг 87 сессиясида бўлиб ўтди.
Ким Чон Ян олдин Интерполнинг катта вице-президенти лавозимида ишлаб келган. Ундан олдин президентлик қилган Хитой вакили Мэн Хунвэй октябрь ойида ўз ватанида коррупцияда айбланиб ҳибсга олинган эди.
Эслатиб ўтамиз, бир неча кун олдин ушбу лавозимга айни дамда Интерполнинг Европа бўйича вице президенти лавозимида ишлаб келаётган Россия вакили Александр Прокопчук ҳам номзод эди.
ОАВларда АҚШ ва Украина, Россия вакилининг Интерполга раҳбар этиб сайланишига қарши фикрлар билдиришган эди. Россия ИИВи Россия вакилига қарши қаратилган ушбу кампанияни “ҳеч қандай ассоссиз, фақат сиёсий манфаатларга асосланган” деб атаган эди.
