ТОШКЕНТ, 25 апр — Sputnik. Ўзбекистон президенти Шавкат Мирзиёев бугун эрталаб Пекинда Хитой раиси Си Цзиньпин билан учрашди, деб хабар қилди президент матбуот хизмати.
Учрашувда Хитой раҳбари Шавкат Мирзиёевни “Бир макон, бир йўл” форумига ташрифи билан қутлаб, Хитой ва Ўзбекистон ҳамкорлигининг бугунги ҳолатини юксак қадрлашини таъкидлади.
"Ҳурматли Президент, Сиз биринчи форумда ҳам иштирок этганингизни мамнуният билан эслайман. Шу маънода, Сизни “Бир макон, бир йўл” халқаро форуми асосчиларидан бири сифатида қабул қиламиз. Ўзбекистоннинг форумга эътибори ва ундаги иштироки мамлакатларимиз ҳамкорлиги ривожидан далолат беради. Икки томонлама кўплаб келишувларга эришилган ва улар изчил амалга оширилмоқда. Ишончим комилки, Ўзбекистон - Хитой муносабатларининг истиқболи порлоқ", - деди Си Цзиньпин.
Шавкат Мирзиёев ўз навбатида Си Цзиньпинни ва мамлакат халқини яқинлашиб келаётган муҳим сана – Хитой Халқ Республикаси ташкил этилганининг 70 йиллиги билан муборакбод этди.
Шунингдек, Ўзбекистон “Бир макон, бир йўл” ташаббусини тўлиқ қўллаб-қувватлаши ва унинг кенг кўламда амалга оширилишига амалий ҳисса қўшишга тайёр эканини таъкидлади.
Учрашув якунида Шавкат Мирзиёев Си Цзиньпинни давлат ташрифи билан Ўзбекистонга келишга таклиф этди.
Эслатиб ўтамиз, Хитой – Ўзбекистоннинг ҳар томонлама стратегик шериги ва энг йирик савдо-иқтисодий ва сармоявий шерикларидан бири. Ўзаро товар айирбошлаш изчил ўсмоқда. Ўтган йил якунларига кўра унинг ҳажми 6,4 миллиард доллардан, жорий йилнинг биринчи чорагида эса 50 фоизга ошган.
