ТОШКЕНТ, 20 май – Sputnik. Киев мэри Виталий Кличко янги сайланган президент Владимир Зеленский инаугурациясига велосипедда келди.
“Бугун шаҳарда ҳаракатланиш қийин. Эрталаб биринчи учрашувга кейин инаугурацияга велосипедда келдим”, - деб ёзди Кличко Twitter саҳифасида.
Доїхав на інавгурацію 🙂 Велосипед сьогодні - найзручніший транспорт! pic.twitter.com/3nc8UG57Tx
— Віталій Кличко (@Vitaliy_Klychko) 20 мая 2019 г.
Бугун, 20 май соат 10-00 Олий Радада Украина янги сайланган президент Владимир Зеленскийнинг инаугурацияси ўтказилди.
Владимир Зеленский Олий рада мажлисида ўнг қўлини конституцияга қўйиб, Украина халқига қасамёд қилди. Конституциявий суд раиси унинг давлат раҳбари лавозимига киришганини эълон қилди.
Зеленский ўз нутқида Украина халқига садоқат билан хизмат қилишга, республиканинг Конституцияси ва қонунларига қатъий риоя этишга, фуқароларнинг ҳуқуқлари ва эркинликларига кафолат беришга, Украина Республикаси президенти зиммасига юклатилган вазифаларни виждонан бажаришга қасамёд қилди.
Эслатиб ўтамиз, Владимир Зеленский 21 апрель куни ўтказилган сайловнинг иккинчи турида амалдаги президент Петро Порошенкони катта фарқ билан ортда қолдириб ғолиб бўлди. Зеленский сайловда иштирок этган украинларнинг 73,22 фоиз овозини олишга эришди.
