ТОШКЕНТ, 19 июн - Sputnik. Ўзбекистонлик бир гуруҳ йигитлар Қозонда йўловчиларни тунаган, уларнинг икки нафари қўлга олинган, қолганларини полиция қидирмоқда, деб хабар қилмоқда Қозон ИИБ.
Тергов маълумотларига кўра, ёвуз ниятли кимсалар томонидан Ново-Савинский тумани ҳудудида камида олтита жиноят содир этилган.
"10 июн куни Савиново полиция бўлимига камида икки жабрдийда мурожаат этган. Чуйкова кўчасида уларга номаълум шахслар томонидан ҳужум содир этилган. Талончилар жабрдийдалар ҳаёти ва соғлигига хавфли бўлган зўравонликларни ишлатган ҳолда, уларга тегишли мулк: телефонлар, сумка, симсиз наушниклар, пуллар ва банк карталарини олиб кетишган. Етказилган моддий зарар миқдори 50 минг сўмдан ошган", - дейилади хабарда.
Эртасига шаҳарнинг яна бир неча фуқароси худди шундай мурожаат билан келган.
Ўтказилган тезкор-қидирув тадбирлари натижасида, 12 июнь куни полициячилар икки нафар гумонланувчини тутган, улар 18 ва 23 ёшли Ўзбекистон фуқаролари бўлиб чиққан.
Ёш йигитлар жиноят содир этишга олдиндан тайёргарлик кўрганликларини тан олганлар. Улар асосан тунги вақтларда йўловчиларга ташланиб, куч ишлатиш йўли билан уларнинг нарсаларини тортиб олган. Жиноят йўли билан топилган нарсаларни улар улоқтирганлар, пуллар ҳамда банк карталаридан ташқари.
Ушбу жиноий гуруҳ тўрт кишидан иборат бўлган. Айни вақтда яна икки нафари қидирилмоқда.
