ТОШКЕНТ, 20 окт –Sputnik. Москвада 2020 йилнинг 1 январидан патент тўловлари нархи 350 рублга ошади, деб хабар қилмоқда Россия ИИВнинг Миграция бошқармаси.
“Москва ҳукумати федерал қонунчиликнинг таалуқли бандига ўзгариш киритди. 2020 йилнинг 1 январидан бошлаб хорижий фуқароларга меҳнат қилиш ҳуқуқи берувчи патент тўлови миқдори ойига 5350 рубл бўлади”, - дейилган хабарда.
Маълумот учун, 2018 йилда патент тўлови миқдори ойига 4500 рублни, 2019 йилда – 5000 рублни ташкил қилган эди. Ўтган йилда Москвада берилган патентлар сони 450 мингтани ташкил қилди. Патент тўловлари ҳисобидан шаҳар бюджетига тушган тўловлар миқдори 17,4 миллиард рубл бўлди.
