ТОШКЕНТ, 19 мар — Sputnik. Ўзбекистон Соғлиқни сақлаш вазирлиги ижтимоий тармоқларда пойтахтдаги Республика шошилинч тиббий ёрдам илмий маркази (РШТЁИМ) ва Тошкент шаҳар “Ибн Сино ”номли 1-сон клиник шифохонаси карантин туфайли ёпилгани ҳақидаги хабар юзасидан изоҳ берди.
Вазирлик хабарида ёзилишича, РШТЁИМ бўлимларидан бирининг шифокори ўзида коронавирус инфекциясига шубҳа қилганлиги боис, ўша бўлим эҳтиёт чораси сифатида маълум муддат карантинга олинган.
Аммо ихтисослашган таҳлиллар натижаси шифокорда ушбу инфекция йўқлигини кўрсатгандан кейин марказ бўлимидаги карантин тартиби бекор қилинди. Ҳозирда марказ одатдагидек узлуксиз фаолият кўрсатмоқда.
1-сон шаҳар клиник шифохонасида эса коронавирусга гумон қилиниб, кейинчалик Республика Вирусология илмий текшириш институти клиникасида ушбу ташхис тасдиқланган фуқаро ўзини Туркияда бўлганлигини яшириб, маълум вақт ушбу шифохонада бўлган.
“Шу ўринда таъкидлаш жоизки, бу айни ўша пайтда мазкур шифохонада коронавирус тарқалди, деган якуний хулоса эмас. Фақат Жаҳон соғлиқни сақлаш ташкилоти талабларига мувофиқ равишда ва қатъий эҳтиёт чораси сифатида ушбу шифохона маълум муддат карантинга олинди. Яқин кунларда даволаш ишлари яна ўз изига туширилади”, - дейилади вазирлик хабарда.
Хабар сўнгги вазирлик коронавирус инфекцияси борасида барча расмий маълумотларни очиқ, ошкора соатма-соат оммавий ахборот воситаларида эълон қилиб борилаётганини таъкидлаб, аҳолидан турли миш-мишларга ишонмасликларини сўраб қолган.