ТОШКЕНТ, 25 май - Sputnik. Тошкент вилоятининг Паркент туманига кириш ва чиқиш, туман ичида ҳаркатланиш чекланди, деб хабар қилмоқда вилоят ҳокимлиги матбуот хизмати.
"Коронавирус инфекцияси тарқалишига қарши чора сифатида, Паркент туманига кириш ва чиқиш чекланди. Бугунги кунгача туман ҳудудини хавфли инфекциядан батамом тозалашда туман ҳокимлиги, СЭОМ, ИИБ, ҳарбийлар ва бошқа мутасадди ташкилотлар томонидан муҳим ишлар амалга оширилмоқда", - дейилган хабарда.
Шунингдек, Паркент туман марказига олиб кирадиган кўчаларда ортиқча автомобиль ҳаракатини чеклаш ва аҳолини мақсадсиз кўчага чиқишини олди олинмоқда. Ушбу ишларни ташкил этишда туманда бўлиб турган ҳарбийлар ёрдам бермоқда.
"Бугун Паркент тумани ҳокими Ниғмат Муҳамедов томонидан блок-постларда хизмат ўтаётган ҳарбийлар рағбатлантирилди", - дейилган хабарда.
Эслатиб ўтамиз, бироз олдин Самарқанд шаҳрида карантин чоралари кучайтирилиб шаҳарга кириш-чиқиш ва шаҳар ичида ҳаракатланиш чекланган эди.
