ТОШКЕНТ, 14 июн — Sputnik. Давлат мактабгача таълим ташкилотларининг фаолиятига жорий йилнинг 1 августидан бошлаб рухсат берилади. Бу ҳақда Республика махсус комиссиясининг қарори қабул қилинди.
Бу қарор тарбияланувчиларни қабул қилишга пухта тайёрлаш, шу жумладан санитария-гигиеник қоидалар ва хавфсизлик чораларини тўлиқ таъминлаш мақсадида қабул қилинган.
Шу билан биргаликда, мактабгача таълим ташкилотларида машғулотларни 15 кишидан ортиқ бўлмаган гуруҳларда ташкил этиш тўғрисидаги чеклов бекор қилинди.
Қўйилган талаблар:
- боғча бинолари доимий равишда дезинфекция қилинади, уларга кириш-чиқиш жойлари пирометрлар, антисептик воситалар ва дезинфекцион “тўшаклар” билан жиҳозланади;
- ходимлар тиббий ниқоб ва тиббий қўлқопдан фойдаланади ва ижтимоий масофани сақлайди;
- тана ҳарорати 37*С ва ундан юқори бўлган ёки инфекция аломатлари мавжуд бўлган ходим ва тарбияланувчилар машғулотларга киритилмайди.
