ТОШКЕНТ, 20 июл — Sputnik. “Ўзавтосаноат” АЖ корхоналари “Volkswagen Caddy”, “Isuzu D-Max” ва “Chevrolet Damas” автомобиллари базасида махсус жиҳозланган тез тиббий ёрдам автомобилларини тақдим этди.
Компания хабарига кўра, машиналар мураккаб пайтда – бутун мамлакат юқори тайёргарлик ҳолатида бўлган пандемия даврида аҳолига хизмат кўрсатишга мўлжалланган.
“Жиззах автомобиль заводи” Тошкент шаҳар тиббиёт муассасаларига “Volkswagen Caddy” базасида тез ёрдам автомобилларини етказиб беришни бошлайди.
“Аҳолига ўз вақтида ёрдам кўрсатишга ўзининг тезкор улушини қўшиш учун “Volkswagen Caddy” базасидаги автомобиллар кейинги ҳафтаданоқ “фронт”га чиқадилар”, - дейилган хабарда.
Бундан ташқари, Самарқанд автомобиль заводидан ҳам “Isuzu D-Max” пикапи базасидаги амбуланслар партияси йўлга чиқди: 27 та тез ёрдам машинаси шаҳар соғлиқни сақлаш бошқармасига топширилди.
Тез ёрдам хизмати махсус санитар автопаркини кенгайтириш ва пандемия даврида беморларга ўз вақтида ёрдам кўрсатиш мақсадларида UzAuto Motors мамлакат минтақаларига “Chevrolet Damas” тез ёрдам автомобиллари партиясини жўнатди.
Соғлиқни сақлаш вазирлиги талабларига мувофиқ жиҳозланган 250 дона тез ёрдам автомобили пойтахт ва минтақалар ҳокимликлари буюртмасига кўра етказиб берилди.
