ТОШКЕНТ, 19 авг - Sputnik. Хитой Беларусь ишларига ташқи кучларнинг аралашишига қарши, мамлакатларни стратегик шериклик боғлаб турибди, деб баёнот берди ХХР ТИВ расмий вакили Чжао Лицзянь.
"Хитой ва Беларусни ҳар томонлама стратегик шериклик муносабатлари боғлаб туради, биз бир-биримизга ишонамиз ва ўзаро манфаатли ҳамкорликни ривожлантирмоқдамиз. Беларусь халқи ўз мамлакатидаги вазиятдан келиб чиққан ҳолда танлаган ривожланиш йўлини, шунингдек, ўз мустақиллиги, суверенитети, хавфсизлиги ва ривожланишини ҳимоя қилиш борасидаги саъй-ҳаракатларини ҳурмат қиламиз", - деди у.
Чжао Лицзяньнинг таъкидлашича, Хитой Беларусдаги жорий вазиятнинг ривожланишини диққат билан кузатмоқда.
"Яхши дўст ва ҳамкор сифатида биз Беларусда хаосни кўришни хоҳламаймиз, биз ташқи кучлар Беларусь жамиятида парчаланиш ва тартибсизликларни келтириб чиқаришига қаршимиз", - ТИВ вакили сўзларидан РИА Новости иқтибос келтиради.
Расмий маълумотларга кўра, норозиликларнинг дастлабки кунларида 6,7 мингдан ортиқ одам ҳибсга олинди. Республика ИИВ хабар беришича, тартибсизликлар пайтида юзлаб одамлар жароҳатланди, улардан 120 нафари ҳуқуқ-тартибот ходимлари. Беларусь ССВнинг маълумотларига кўра, 2 намойишчи ҳалок бўлди.
