ТОШКЕНТ, 15 дек — Sputnik. АҚШ президентлигига номзод Жо Байден сайловчилар ҳайъатининг (Electoral College) 306 та овозига эга бўлган. Президентликка сайланиш учун уларнинг 270 овози етарли ҳисобланади.
Барча штатлардаги сайловчилар ҳайъатининг овоз бериш жараёнлари якунланиб, бир неча ҳафтадан буён тахмин қилинганидек, Байден 306 та, Трамп эса 232 та овозга эга бўлди.
Шу тариқа сайловчилар ҳайъати мамлакатда бўлиб ўтган овоз бериш якунларини тасдиқлади, унга кўра Байден янги давлат раҳбари бўлади.
Янги сайланган АҚШ президенти Жо Байден сайловчилар ҳайъатининг овоз бериш якунларини унинг амалдаги Америка етакчиси Дональд Трамп устидан қозонган “аниқ ғалабаси” деб атади ва рақибини ҳурмат кўрсатишга чақирди.
Дональд Трамп мағлубиятни тан олмаяпти ва натижалар устидан шикоят келтирмоқда, аммо ҳозирча ҳеч бир суд уни қўллаб-қувватламади.
