Нур-Султонда Ўзбекистон элчихонасининг янги биноси очилди
Oбуна бўлиш
ТОШКЕНТ, 7 дек - Sputnik. Шавкат Мирзиёевнинг Қозоғистонга ташрифи доирасида Нур-Султон шаҳрида Ўзбекистон элчихонасининг янги биноси очилиш маросими бўлиб ўтди.
Президент Шавкат Мирзиёев ва Президент Қасим-Жомарт Тоқаев рамзий боғични кесиб, янги бинони тантанали равишда очдилар. Икки мамлакатнинг давлат мадҳиялари янгради.
Шундан сўнг президентлар элчихонада яратилган шароитлар билан танишди.
Элчихонасининг янги, замонавий биноси ўзбекистонлик қурувчилар томонидан барпо этилган, унинг хоналари миллий услубда безатилган. Дипломатик ваколатхона ҳудудида асосий бино, консуллик бўлими, ходимлар учун уй, дипломатик миссия раҳбарининг қароргоҳи, болалар ва спорт майдончалари жойлашган. Шунингдек элчихонада музокара хоналари, анжуманлар зали ва кутубхона ҳам бор.
Элчихонала онлайн музокаралар ўтказиш, консуллик фаолияти учун “электрон навбат” тизими ўрнатилган ва бу ерга келувчилар маълумотларни интерфаол тарзда олиш имкониятига эга. Алоҳида эҳтиёжли одамлар учун ҳам зарур шароитлар яратилган.
Шавкат Мирзиёев ва Қасим-Жомарт Тоқаев элчихонанинг Фахрий меҳмонлар китобида қайд ёзиб қолдирдилар.
