Лавров Зеленскийнинг “тинчлик формуласи”ни хом хаёл деб атади
12:12 29.12.2022 (янгиланди: 18:42 05.04.2023)
© Sputnik / Сергей Гунеев
/ Oбуна бўлиш
Киев Ғарб ёрдамида Россияни Донбасс, Қрим, Запорожье ва Херсондан чиқариб юборишга умид қилмоқда, аммо бу хом хаёл, бу уларнинг мулоқотга тайёр эмаслигини англатади холос.
ТОШКЕНТ, 29 дек — Sputnik. Россия ҳеч ким билан Владимир Зеленский таклиф қилган “тинчлик формуласи” асосида гаплашмоқчи эмас, Киевнинг ўзи ҳам мулоқотга тайёр эмаслиги аниқ. Бу ҳақда Россия ташқи ишлар вазири Сергей Лавров РИA Новости агентлигига берган интервьюсида таъкидлади.
“Шубҳасиз, Киев мулоқотга тайёр эмас. Зеленский ҳар хил ғоялар ва “тинчлик формулаларини” илгари сурар экан, Ғарб ёрдамида қўшинларимизни Россия ҳудуди Донбассдан, Қрим, Запорожье ва Херсон вилоятидан олиб чиқиб кетишга эришиш хом хаёлига умид қилади. Aлбатта, биз ҳеч ким билан бундай шартларда гаплашмаймиз”, деди Лавров.
Унинг қўшимча қилишича, Москва можарони дипломатик йўл билан ҳал қилиш ғоясидан воз кечмаган.
“Эслатиб қўймоқчиманки, махсус ҳарбий операция бошланганидан сўнг дарҳол Владимир Зеленский музокаралар столига ўтириш ташаббуси билан чиқди. Биз буни рад этмадик ва унинг вакиллари билан учрашишга рози бўлдик. Музокараларнинг бир неча раундлари шуни кўрсатдики, ўзаро мақбул келишувларни топиш мумкин эди. Бироқ февраль ойида бошланган музокаралар жараёни Зеленскийнинг муҳим қарорлар қабул қилишда мутлақо мустақил эмаслигини кўрсатди. Aпрель ойидаёқ жанговар ҳаракатларни давом эттиришдан манфаатдор бўлган англо-саксларнинг буйруғи билан у тезда музокараларни тўхтатди ва ўз позициясини кескин қаттиқлаштирди”, дея хулоса қилди вазир.
ТИВ раҳбарининг сўзларига кўра, ҳозир Украинада муносиб сиёсатчилар бор ёки йўқлигини айтиш қийин.
“Киев режими назорати остидаги ҳудудларда адекват сиёсатчилар қолди, дейиш қийин. Кейинчалик Киевда қандайдир соғлом сиёсий арбоб пайдо бўлиши мумкинми? Яшасак, кўрамиз”, деди Лавров.
Ноябрь ойи бошида Украина президенти Владимир Зеленский Ғарб ОAВлари Киевни Москва билан мулоқотга ундаётгани ҳақидаги хабарларидан сўнг, музокараларни бошлаш учун республика шартларини айтиб ўтган эди. Унинг сўзларига кўра, бу “ҳудудий яхлитликни тиклаш, БМТ Низомига ҳурмат, барча йўқотишлар учун товон тўлаш, ҳар бир ҳарбий жиноятчини жазолаш ва бундай ҳолат бошқа такрорланмаслигига кафолатдир”.
Шу билан бирга, Зеленский аввалроқ Россиянинг амалдаги раҳбарияти билан музокара олиб боришнинг мумкин эмаслиги ҳақидаги фармонни имзолаган эди. У, шунингдек, Киев мамлакатдаги ҳокимият ўзгармас экан, Москва билан мулоқот ўтказмаслигини айтди.
Россия музокараларга тайёрлиги ҳақида бир неча бор айтган.
Президент Владимир Путин барча можаролар дипломатик йўллар билан тугашини таъкидлаган. Кремлга кўра, Зеленский агар хоҳласа, мамлакатдаги жанговар ҳаракатлар эртаси куни тугаши мумкинлигини билади.
