ТОШКЕНТ, 27 мар — Sputnik. Коронавирус эпидемияси сабаб, аҳолидан уйда қолиб вирусга қарши курашиш талаб этилди. Маданият вазирлиги аҳолининг уйда маданий ҳордиқ чиқариши учун турли имкониятлар яратмоқда, деб хабар берди вазирлик ахборот хизмати.
Хусусан, ҳар бир фуқаронинг ўз вақтини мазмунли ва фойдали ўтказиши учун телеканаллар орқали дарс машғулотлари, қизиқарли ва оммабоп фильмлар намойиши, фойдали маслаҳатлар ва тавсиявий кўринишдаги телекўрсатувлар ташкил этилган, санъаткорлар ва актёрлар иштирокида қизиқарли видеороликлар, кўрсатувлар тайёрланиб, эфирга узатилмоқда.
Карантин туфайли янги спектакллар намойиши афсуски вақтинчалик тўхтатилган, аммо илгари саҳаналаштирилган спектакллар ойнаи жаҳон орқали намойиш этиб борилади.
Бундан ташқари Маданият вазирлиги томонидан 24 март куни “Уйдаги юлдузлар” танлови эълон қилинган. Танлов мақсади уйда қолиб ижод қиладиган иштирокчиларни рағбатлантиришдан иборат бўлиб, энг яхши ижод намуналари 5 та йўналиш бўйича сараланади.
“Энг яхши чолғу ижрочиси”, “Энг яхши хонанда” (мақом, бахши, эстрада ва опера йўналишлари бўйича), “Энг яхши рақс ижрочиси”, “Энг яхши рассом”, “Энг яхши хунарманд” каби йўналишлар шулар жумласидандир. Ғолиблар эса жорий йилнинг 30 апрель куни тақдирланади.
Давлат музейлари томонидан эса аҳолига мобиль иловалар орқали масофавий хизмат кўрсатиш шароити йўлга қўйилган бўлиб, 3d.museums.uz электорон манзили орқали 13 та музейларнинг 3D кўринишлари жорий этилган. Бунда ҳар бир фуқаро ўз уяли алоқа аппарати орқали музейларга саёҳат қилиш, унда сайланаётган экспонантларни масофавий томоша қилиш имконига эга.
goskatalog.uz сайти орқали эса республикадаги барча музейларда сақланаётган экспонатлар тўғрисида маълумотлар киритилган. Бунда томошабинлар бевосита смартфон орқали ҳар бир экспонатнинг тарихийлиги ва ўзини кўра олади.
