Ўзбекистон ҳаво йўллари илк Орзу лайнерини қабул қилди

ТОШКЕНТ, 31 авг — Sputnik. “Ўзбекистон ҳаво йўллари” миллий авиакомпанияси тижорий фойдаланиш учун янги типдаги икки Boeing-787 Dreamliner самолётидан бирини қабул қилиб олди.

Бугун Тошкент аэропортида шу муносабат билан янги “орзу лайнери”нинг қабул қилиб олинишига бағишланган тантанали тадбир бўлиб ўтди, деб хабар беради Sputnik Ўзбекистон мухбири. Самолёт Ўзбекистон мустақиллигининг 25 йиллиги байрамига муносиб совға бўлди. Янги Boeing-787 Dreamliner’ни учувчи инструктор Иосиф Зак, парвоз командири Асаджон Турсунов ва авиакомпаниянинг бош штурмани Станислав Гурфинкеллар бошқаришди. Самолёт Сиэтлдан Тошкентга 12 соат тинимсиз парвоз қилди.

Ушбу самолёт замонавий Boeing 767 га нисбатан ёқилғини 10 фоизга тежайди. Тошкентдан Москвага етиб бориш вақти 10 дақиқага, Лондон ва Парижга эса 20-30 дақиқага қисқаради. Унда дунёнинг энг чекка нуқталарига ҳам парвоз қилиш мумкин.

Йўловчи ўриндиқларининг умумий сони 246та. Ҳар бир йўловчи учун кўрсатувлар кўриш имконини берувчи алоҳида экран билан жиҳозланган.

Авиакомпания раҳбари Валерия Тяннинг айтишича, сентябрдан “орзу лайнери”да Ўзбекистондан АҚШ ва Канада, Узоқ Шарқ, Осиё, Африка, Австралиянинг исталган аэропортларига парвозларни йўлга қўйилади. Тез орада авиакомпания парки яна бир мана шундай самолётга эга бўлади.