ТОШКЕНТ, 21 июн — Sputnik. Чехия ва Ўзбекистон трамвай вагонларини Ўзбекистонда биргаликда ишлаб чиқаришга келишиб олди, деб хабар берди Самарқанд вилояти ҳокимлиги матбуот-хизмати.
"Делегация аъзолари Самарқанд шаҳар ҳокими Фурқат Раҳимов билан учрашди", — дейилади хабарда.
Суҳбат чоғида икки томонлама ҳамкорликни мустаҳкамлаш, жумладан, Чехияда ишлаб чиқариладиган трамвай вагонларини харид қилиш, уларга техник хизмат кўрсатиш ва таъмирлаш масалалар муҳокама этилган. Шунингдек, трамвай вагонларини Ўзбекистонда биргаликда ишлаб чиқариш, йўловчилар учун янада қулайликлар яратиш бўйича ҳам фикрлашиб олинган.
Меҳмонлар "Трамвай йўналишларидан фойдаланиш дирекцияси" давлат корхонаси фаолияти билан ҳам танишиб, ўзаро ҳамкорлик юзасидан келишувларга эришган.
