ТОШКЕНТ, 17 янв – Sputnik. Андижонда фармацевтика соҳасида инвестицияларни жалб этиш мақсадида ихтисослашган эркин иқтисодий зона ташкил этилди, дейилган президент фармонида, УзА хабарига асосан.
Президент фармони айтилишига кўра, “Андижон-фарм” – эркин иқтисодий зонаси (ЭИЗ) ташкил этишдан асосий мақсад қуйидагилар:
- юқори технологияли фармацевтика корхоналарини ташкил этиш бўйича инвестиция лойиҳаларини амалга ошириш;
- энг аввало, Ҳиндистон Республикасидан тўғридан-тўғри инвестицияларни фаол жалб этиш учун қулай шарт-шароитлар яратиш;
- ички бозорни маҳаллий доривор ўсимликлар хом ашёсини чуқур қайта ишлаш асосида ишлаб чиқарилган юқори сифатли дори воситалари билан тўлдириш;
- Андижон вилоятида янги иш ўринларини яратишдир.
Президент фармонида, “Андижон-фарм” ЭИЗнинг фаолият юритиш муддати 30 йилни ташкил этади ва ушбу муддат кейинчалик узайтирилиши мумкин, дейилган. Шунингдек, “Андижон-фарм” ЭИЗ фаолият юритадиган муддат давомида унинг ҳудудида алоҳида солиқ ва божхона тартиблари амал қилади.
Ундан ташқари, “Андижон-фарм” ЭИЗ дирекциясига Ўзбекистон Республикаси Президентининг “Ургут”, “Ғиждувон”, “Қўқон” ва “Ҳазорасп” эркин иқтисодий зоналарини ташкил этиш тўғрисида” 2017 йил 12 январдаги ПФ–4931-сон Фармонининг 8-банди қоидалари татбиқ этилади.
“Андижон-фарм” ЭИЗни ташкил этиш ҳақидаги президент фармони билан батафсил қуйида танишишингиз мумкин.