ТОШКЕНТ, 13 фев — Sputnik. Ўзбекистонда 16 та янги мини ГЭС қурилади ва 4 та ГЭС модернизация қилинади. Бу муҳокамага қўйилган Давлат дастури лойиҳасида кўзда тутилган.
“Умумий қуввати 127,2 МВт бўлган йилига ўртача 534,1 млн. кВт.соат электр энергия ишлаб чиқарувчи 16 та янги мини ГЭСларни қуриш ва 4 та ГЭСни модернизация қилиш”, - дейилган ҳужжатда.
Ҳудудларда ишлаб чиқариш ва инженерлик-коммуникация инфратузилмасини ривожлантириш, бунга республика ва маҳаллий бюджетларнинг прогноздан юқори тушумларининг ярми йўналтирилади.
Эслатиб ўтамиз, аввалроқ мамлакатда жорий йилда қарийб 1300 мегаватт қувватлар ишга туширилиши режалаштирилгани хабар қилинган эди. Шунингдек, тўғридан-тўғри хорижий инвестициялар ҳисобига 3 минг 500 мегаваттли буғ-газ қурилмалари, 400 мегаваттли шамол ва шундай қувватга эга қуёш электр станцияларини қуриш бўйича лойиҳалар шакллантирилган.
