ТОШКЕНТ, 29 апр — Sputnik. Тўрт ёшли қизалоқни ўлдирганликда айбланаётган “қотил энага” Гулчеҳра Бобоқулова узоқ вақт давом этган уйқусизлик туфайли Самарқандда руҳий касалхонада рўйхатда турганини айтди.
“Ҳа, мен рўйхатда турганман, Самарқандда. Тўрт ой давомида умуман ухламаганман. Касалхонада икки ҳафта ётганман. Улар “бу бизнинг касаллик эмас” дейишган”, — деди Бобоқулова.
Унга қўйилган ташхисни эслай олмади. Фақат “дори беришган” ва “уч кун Қуръон ўқишган”ини эслади, холос.
Яқинда Гулчеҳра Бобоқулова Москвадаги Сербский институтида руҳий текширувдан ўтган эди. Ушбу текширув натижаси ҳали эълон қилингани йўқ. Текширувдан кейин Бобоқулова Бутирка қамоқхонасидаги руҳий касалхонага қайтарилган эди.
Эслатиб ўтамиз, Москвада март ойининг бошида ваҳший қотиллик содир бўлган эди. Хонадонларнинг бирида энага бўлиб ишлайдиган Гулчеҳра Бобоқулова ўз қарамоғида бўлган тўрт ёшли қизчани ўлдириб, хонадонга ўт қўйиб кўчага чиқиб кетган.
Кўчада Бобоқулова ўлдирилган қизалоқнинг кесиб олинган бошини кўтариб ўз-ўзига гапириб юрган. Уни тутмоқчи бўлган полиция ходимларига ўзини портлатиб юбориши мумкинлигини айтган.
Ушбу жиноят тафсилотлари Россия Тергов қўмитаси томонидан ўрганилмоқда. ТҚ фикрига кўра Бобоқуловани кимдир гиж-гижлаган бўлиши мумкин. У билан бирга яшаган кишилардан бири уни “ислом экстремистик ғоялари” билан “заҳарлаган” бўлиши мумкин.
