ФВВ Андижондаги музқаймоқдан оммавий заҳарланиш ҳақида расмий маълумот берди

© AFP 2023 / GABRIEL BOUYSМороженое
Мороженое - Sputnik Ўзбекистон
Oбуна бўлиш
Юз берган овқатдан заҳарланиш ҳолатининг келиб чиқиш сабабларини аниқлаш мақсадида, туман ички ишлар бўлими томонидан суриштирув ишлари олиб борилмоқда

ТОШКЕНТ, 17 май — Sputnik. Андижон вилоятининг Шаҳрихон туманида музқаймоқдан оммавий заҳарланиш ҳолати юз бергани ҳақида хабар бергандик. Ўзбекистон Фавқулодда вазиятлар вазирлиги сайтида мазкур ҳолат юзасидан махсус хабарнома жойлаштирилди.

Хабарномага кўра, 2017 йилнинг 15 май куни давомида Шаҳрихон тумани тиббиёт бирлашмасига ва Юқумли касалликлар шифохонасига қайт қилиш ва ич кетиш каби овқатдан заҳарланиш белгилари билан 212 нафар фуқаролар мурожаат қилган.

Музқаймоқ - Sputnik Ўзбекистон
Оммавий заҳарланишдан сўнг Шаҳрихондаги барча музқаймоқ кафелари ёпилди

Мурожаат қилган барча фуқароларга шифохонада белгиланган тартибдаги тиббий муолажалар кўрсатилиб, 186 нафари стационар ҳолатда даволаниш учун ётқизилган. Беморларнинг барчаси туман марказида жойлашган "Макс" кафесида музқаймоқ истеъмол қилишганини айтишган ва касалланишларини шу билан боғлашган.

Юзага келган кескин эпидемик вазиятни юмшатиш ва зарур маслаҳат ҳамда амалий-услубий ёрдам кўрсатиш мақсадида, 15 май кунидан бошлаб туманда Давлат Бош санитар врачи — Соғлиқни сақлаш вазири ўринбосари С.Сайдалиэв раҳбарлигида республика ишчи гуруҳи фаолият олиб бормоқда.

Беморларга кўрсатилган барча зарур даволаш муолажалари самараси ўтган суткалар ичида, яъни 17 май соат 8.00 ҳолатига 153 нафар фуқаронинг ҳолати яхшиланиб, уйига жавоб берилган. Қолган 33 нафар беморнинг ҳолати қониқарли, кундан-кунга яхшиланиб бормоқда.

Давлат санитария-эпидемиология назорати маркази мутахассислари томонидан беморлар истеъмол қилган музқаймоқ ҳамда ичимлик суви манбаларидан бактериологик ва кимёвий таҳлиллар ўтказиш учун намуналар олинган, уларни текшириш ишлари давом этмоқда.

Фавқулодда вазиятлар вазирлиги ва вилоят ҳокимиятининг бир гуруҳ мутахассислари томонидан Шаҳрихон туманида амалга оширилаётган профилактик тадбирларни мувофиқлаштириш ишлари олиб борилмоқда.

Юз берган овқатдан заҳарланиш ҳолатининг келиб чиқиш сабабларини аниқлаш мақсадида, туман ички ишлар бўлими томонидан суриштирув ишлари олиб борилмоқда.

Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.

Янгиликлар лентаси
0