ТОШКЕНТ, 26 ноя - Sputnik. Москва шаҳридаги ўзбекистонликлар иштирокида содир бўлган оммавий муштлашувга футбол мусобақасида қоидалар бузилиши натижасида келиб чиққан низо сабаб бўлган. Бу ҳақда Ташқи ишлар вазирлиги мамлакатнинг Россиядаги элчихонаси консуллик бўлими маълумотига асосланиб хабар қилди.
Қайд этилишича, мазкур ҳодиса натижасида 15 киши қўлга олинган Улардан 10 нафари Ўзбекистон фуқароларидир.
Олинган маълумотларга кўра жароҳатланганлар мавжуд эмас. Айни пайтда дастлабки тергов ҳаракатлари амалга оширилмоқда.
Хабарда элчихонанинг консуллик бўлими вазиятни назоратга олгани қўшимча қилинган.
Эслатиб ўтамиз, аввалроқ Москва марказида мигрантлар ўртасида оммавий муштлашув содир бўлгани хабар қилинган ва муштлашув иштирокчилари қайси давлат фуқаролари эканлигига ойдинлик киритилмаган эди.
