ТОШКЕНТ, 17 янв – Sputnik. Санкт-Петербургдаги Ягона ойна ходимаси Ўзбекистон фуқаросига қўполлик қилгани учун интизомий жавобгарликка тортилди. Бу ҳақда Ташқи меҳнат миграцияси агентлиги матбуот ходими маълум қилди.
Қайд этилишича, Санкт-Петербургнинг Виборг туманида Ўзбекистон фуқароси “ягона ойна” — давлат ва муниципал хизматларни кўрсатиш маркази ходимасининг хизмати кўрсатиш услубидан норози бўлган.
Шу боис унинг устидан бошқа миллат вакили бўлгани сабабли ҳурматсизлик қилингани юзасидан Санкт-Петербург омбудсманига шикоят қилган.
Марказ инспектори эса бепарволик билан Ўзбекистон фуқароси аризасини рўйхатдан ўтказишдан бош тортган ва қўполлик билан паспорт ва ҳужжатларини унинг олдига ташлаган.
Фуқаро ҳужжатларнинг тўғрилигини текшириб, бошқа инспекторни кутишга мажбур бўлган.
Кўрилган чоралар натижасида, марказ ходимаси ушбу хатти-ҳаракатлари учун Ўзбекистон фуқаросидан узр сўраган ва интизомий жавобгарликка тортилган.
