"Ўзбекистон" ТРК раиси нега ишдан олинди?

TOШКЕНТ, 3 август — Sputnik. Хуршид Мирзоҳидов Ўзбекистон миллий телерадиокомпанияси раҳбари лавозимидан озод қилинди.

МТРК расмий сайтида ҳам Мирзоҳидовнинг фамилияси раҳбарлар рўйхатидан олиб ташланган.

Мирзоҳидов 2017 йилнинг февралида телерадиокомпания раиси этиб тайинланган эди.

Июль ойи охирида МТРК куну-тун фаолият кўрсатадиган "Ўзбекистон 24" телеканалини ишга туширган эди.

Эслатиб ўтамиз, "Камолот"  ЁИҲ IV қурултойида Ўзбекистон президенти ўз чиқиши давомида Озодбек Назарбековни "Ёшлар"га раҳбар этиб тайинлар экан "Мирзоҳидов деган каттакон қани, шу ердами? Эртадан бошлаб "Ёшлар" каналининг раҳбари Озодбек Назарбеков бўлади, агар халақит берсаларинг 50% одамингни қисқартираман, тушундингими" деб айтган эди.

30 июл куни "Ўзбекистон 24" телеканалида намойиш этилган "Таҳлилнома" кўрсатувида эса ўтган йиллар мобайнида ташқи сиёсатда йўл қўйилган камчиликлар очиқ-ойдин танқид қилинган.

Дастур давомида бошловчи томонидан айтилган гаплар "Ўзбекистон биринчи маротаба Ислом Каримов сиёсатини қоралади" деган талқинда хориж матбуотларини айланиб чиқди.

Ўзбекистондаги маҳаллий электрон нашрларда Хуршид Мирзоҳидов айнан шу кўрсатув сабабли ишдан олинди деган хабарлар тарқалди, аммо сал ўтмай "бу хабарлар расман ўз тасдиғини топмади" дея раддия берди.

Ўзбекистон Халқ шоири Хуршид Даврон МТРКдаги ўзгаришлар хусусида ўзининг Фейсбукдаги аккаунтида қуйидагича пост қолдирган:

"Алишер Ходжаев (бу менинг саводсизлигим эмас, паспортида шундай) ўрнига тайинланган Хуршид Мирзоҳидов ҳам ишдан кетибди. Ярим йил ишламасдан кетди. Хуршид Мирзоҳидов билан ишлаганман, яхши одам. Умр бўйи телемарказда ишлаган Собир аканинг ўғли. Отаси, озгина маҳаллийчилигини ҳисобга олмасак, дуруст одам, профессионал. Бир неча йил у киши техника, мен эса ("Ёшлар"у "Ўзбекистон" ТРК директорлигидан кейин) мафкура соҳасида раисга маслаҳатчи бўлганмиз.

Аммо, Алишер Ходжаевнинг ҳам, Хуршид Мирзоҳидовнинг ҳам МТРК — Milliy телерадиокомпанияга раҳбар этиб тайинланганини-ю тайинланишини ТВ ва радио фаолиятига зид эканини қатъий айтишим керак. 20 йиллик ТВдаги фаолиятим буни қатъий айтишимга сабабдир. ТВ ва радио фаолиятини икки дунёда ҳам технарь ходим бошқармаслиги шарт. ТВ ва радио энг аввало мафкура ва ижод. Айни шунинг учун бу тизимни мафкура билан ижодни уйғун этган маърифатчи киши бошқариши керак (Айтишим шарт ва лозимки, бу ўринда мутлақо ўзимни кўрмаяпман). Билмадим, бундан кейин ким МТРК раҳбари бўлади. Давлат маслаҳатчиси мақомидаги ўзбек Берияси таклифи билан яна қайси унинг одами (одами ҳам бўлмаслиги мумкин, унга муҳими оғизсиз ва тилсиз бўлиши шарт.

Яқинда тасдиқланган матбуот қўмитаси раҳбарига ўхшаган) тайинланади-ю бир неча ойдан кейин ишни баттар қилиб ишдан кетаркан? Лекин, жуда ва жуда узоқ ишлаши ҳам мумкин. Бу эса нафақат ТВ ва радиога, умуммиллий тараққиётга фақат зарар келтиради".

Ҳозиргача ҳеч бир расмий манбада Мирзоҳидов нега ишдан олингани сабаби маълум қилинмади.