ТОШКЕНТ, 26 апр — Sputnik. Ўзбекистон Ички ишлар вазири маслаҳатчиси, генерал-полковник Зокиржон Алматов бошчилигидаги ишчи гуруҳ вакиллари Бухоро вилоятига ташриф буюриб, ИИБ ходимлари ва кенг жамоатчилик вакиллари билан учрашди, деб хабар берди Бухоро вилояти ҳокимлиги матбуот-хизмати.
Таъкидланишича, Бухорода ўтган йиғилишда вилоят ҳокими Ўктам Барноев сўзга чиққан ва Ўзбекистон Республикасининг собиқ ички ишлар вазири генерал-полковник Зокиржон Алматовнинг меҳнат фаолияти жуда мураккаб даврларга тўғри келганига қарамай, ўз касбининг касбининг фидойиси бундай таҳликали даврда метиндек ирода, мардлик, жасурлик кўрсатиб Ўзбекистонни оғир даврдан олиб чиққани ҳамда бугунги тинчликнинг сабабчиларидан бири эканлигини алоҳида эътироф этган.
Шундан сўнг генерал-полковник Зокиржон Алматов ўзининг хотиралари ва Ўзбекистон президенти Шавкат Мирзиёев томонидан олиб борилаётган халқни рози қилиш сиёсатининг аҳамияти ҳақида алоҳида тўхталиб, вилоятдаги маҳалла оқсоқолларига бу эзгу сиёсатнинг мақсадини ҳар бир хонадонга етказиш, униб ўсаётган ҳар бир ёшни ватанга муҳаббат руҳида тарбиялаш лозимлигини таъкидлаган.
Алматов бошчилигидаги ишчи гуруҳ Бухоро вилоятида жиноятчилик ва ҳуқуқбузарликларнинг олдини олиш, фуқаролар осойишталигини таъминлаш ва жамоат тартибини сақлаш йўналишида олиб борилаётган ишларни таҳлил қилган.
