ТОШКЕНТ, 24 июн — Sputnik. Мудофаа вазирлигига қарашли олий ҳарбий таълим муассасалари — Қуролли Кучлар академияси (умумқўшин факультети), Жиззах олий ҳарбий авиация билим юрти, Муҳаммад ал-Хоразмий номидаги Тошкент ахборот тезхнологиялари университети махсус факультети ва Тошкент тиббиёт академияси ҳузуридаги ҳарбий-тиббиёт факультетида ёш офицерларнинг навбатдаги битируви муносабати билан тантанали тадбирлар ўтказилди.
Сўзга чиққанлар битирувчиларни самимий муборакбод этиб, кейинги хизматида муваффақият ва омадлар тилади.
Ўзбекистон Мустақиллигининг 27 йиллиги арафасида қўшинларга йўлланма олган лейтенантлар Қуролли Кучлар шахсий таркибининг жанговар тайёргарлиги маъно-мазмунини тубдан ўзгартириш, тактик, ўқув машқларини пухта режалаштириш, уларни жанговар шароитларга имкон қадар тўла яқинлаштирган ҳолда олиб бориш тизимини такомиллаштириш, ҳарбий хизматчиларни Ватанга муҳаббат ва садоқат руҳида тарбиялаш борасида бор билим ва кўникмаларини ишга солиб, ўзларининг муносиб улушларини қўшишига ишонч билдиришди.
