ТОШКЕНТ, 25 окт - Sputnik. Ўзбекистон президенти Шавкат Мирзиёев Самарқанд халқаро аэропорти янги терминали лойиҳасини танлади, деб хабар берилди "Ўзбекистон 24" телеканалининг "Янгиликлар 24" дастурида.
"Қўшимча терминал дизайни ўтмиш ва келажак синтезини ўзида мужассамлаштиради, шунингдек, халқаро талабларга жавоб бериб, соатига 600 йўловчига хизмат кўрсатади", - дейилади хабарда.
Август ойида Самарқанд аэропорти таъмирлаш ишларидан кейин очилган эди. Аэробандаргоҳнинг тўлиқ реконструкцияси 2022 йил баҳорида - Самарқандда ўтказилиши режалаштирилган Шанхай ҳамкорлик ташкилоти саммити арафасида якунланиши кутилмоқда.
Сал олдин Самарқанд вилоятидаги 13 та объект атрофида бепул ва пулли Wi-Fi зоналари ташкил этилгани ҳақида хабар берган эдик. Бепул Wi-Fi хизмати темир йўл вокзалларида ташкил этилган бўлса, пулли ва бепул Wi-Fi зоналари Самарқанд халқаро аэропорти ва яна ўндан зиёд объектларда ташкиллаштирилгани айтилганди.