ТОШКЕНТ, 2 июн — Sputnik. Ўзбекистон президенти Ш.Мирзиёев Туркманистон ва Ўзбекистон ўртасида Стратегик ҳамкорлик тўғрисидаги келишувни ратификациялаш тўғрисидаги қонунни имзолади.
Қонун Қонунчилик палатаси томонидан 17 май, Сенат томонидан 27 май куни мақулланган. Ушбу шартнома 2017 йил 6 мартда Ўзбекистон президенти Шавкат Мирзиёевнинг Туркманистонга амалга оширган давлат ташрифи давомида имзоланган эди.
Сенат матбуот хизмати маълумотларига кўра, шартнома Туркманистон ва Ўзбекистон ўртасида муносабатларни янги стратегик босқичга олиб чиқади, савдо-иқтисодий муносабатларни ривожлантириш, товар айирбошлаш ҳажмини кўпайтириш ҳамда дўстона ва ўзаро манфаатли шерикчиликни мустаҳкамлашни кўзда тутади, деб ёзади РИА Новости.
Эслатиб ўтамиз, шу йил март ва май ойларида Ўзбекистон президенти Шавкат Мирзиёев ва Туркманистон президенти Гурбангули Бердимуҳамедов ўртасида музокаралар ўтказилган. Музокаралар натижасида бир қатор муҳим келишувлар имзоланган. Икки томонлама ўзаро манфаатли бўлган йўналишларда, жумладан сиёсий, савдо-иқтисодий, транспорт-коммуникация ва маданий-гуманитар соҳалар бўйича алоқаларни ривожлантириш кўзда тутилган.
Бизнинг Telegramдаги ўзбекча каналимизга обуна бўлинг ва энг янги хабарларни биринчи бўлиб ўқинг.
