ТОШКЕНТ, 24 июл – Sputnik. Ўзбекистон президентининг Афғонистон бўйича махсус вакили Исматулла Иргашев Япония Муваққат ишлар вакили Ацуши Суда билан учрашди.
ТИВ хабарига кўра, суҳбат чоғида Ўзбекистон ва Япониянинг Афғонистондаги танг ҳолатни ҳал қилишдаги саъй-ҳаракатлари, ушбу мамлакатда турли лойиҳаларни биргаликда ҳаётга тадбиқ қилишда ҳамкорлик қилишнинг устувор йўналишлари муҳокама қилинди.
Хабарда қайд этилишича, Япония томони Ўзбекистоннинг Афғонистонда тинчлик ўрнатишга қаратилган сиёсий жараённи бошлаш борасидаги саъй-ҳаракатларига, мазкур мамлакатда амалга оширилаётган кенг кўламли иқтисодий лойиҳаларга юқори баҳо берган.
Шунингдек, Афғонистоннинг ижтимоий-иқтисодий инфратузилмаларини қайта тиклашда халқаро ҳамжамият фаолиятини кенгайтиришнинг муҳимлиги тўғрисидаги фикрни ҳар томонлама қўллаб-қувватлаган.
Шавкат Мирзиёев кузда Японияга ташриф буюради
Эслатиб ўтамиз, аввалроқ Ўзбекистон инклюзив афғонлараро мулоқотнинг навбатдаги раундини Самарқанд шаҳрида ўтказиш учун зарур шарт-шароитларни яратишга тайёрлигини яна бир бор тасдиқлагани ва бўлажак музокаралар муваффақиятли бўлишига умид билдиргани хабар қилинган эди.
