ТОШКЕНТ, 11 мар — Sputnik. Ўзбекистонда ички ишлар органларининг ташкилий тизими ислоҳ қилинади. Шавкат Мирзиёев мамлакат миқёсида ва туманлар кесимида куч ва воситаларни бошқаришнинг янги механизмларига бағишланган лойиҳа тақдимоти билан танишди.
Давлат раҳбари матбуот хизмати хабарига кўра, ички ишлар органлари бошқарув тизимидаги қатор раҳбарлик лавозимларини оптималлаштириш бўйича таклифлар билдирилган. Таъкидланишича, бу ҳуқуқбузарликлар профилактикаси ва жиноятчиликка қарши курашиш борасида кундалик фаолиятни самарали ташкил этиш учун қулай шароитлар яратади.
Тошкент шаҳар ички ишлар органлари ишининг натижалари муҳокама қилиниб, жорий йилда пойтахтда жамоат хавфсизлигини таъминлаш самарадорлигини янада оширишнинг асосий концептуал йўналишлари тўғрисида ахборот берилди.
“Ушбу янги тартиб ички ишлар органлари хизмат ва бўлинмаларининг ўзаро ҳамкорлиги самарадорлигини ошириш, мавжуд бюрократия ҳолатларини қисқартириш, жойларда шахсий таркибни бошқариш бўйича сифат жиҳатидан янги тизимни босқичма-босқич яратиш мақсадида жорий этилмоқда”, - дейилган хабарда.
Эслатиб ўтамиз, аввалроқ президент Шавкат Мирзиёев “рақамли Тошкент” лойиҳаси билан танишиб, кўплаб кўрсатмалар бергани хабар қилинган эди.
