ТОШКЕНТ, 2 мар — Sputnik. Ўзбекистонда охирги ярим йил давомида 31 миллиард сўмлик автомашина "чиройли" рақамлари сотилди, деб хабар қилди Sputnik мухбири.
"Чиройли" авторақамларини сотиш бўйича янгича тизим ўтган йилнинг сентябр ойида Ўзбекистон товар-хомашё биржаси порталида йўлга қўйилганди.
Ўтган давр мобайнида 1780 дан ортиқ автомашина давлат рақамлари 31 миллиард сўмга сотилган. Бу ҳақда Халқаро пресс-клуб йиғилишида ИИВ ЙҲХБ вакили маълум қилди.
"Чиройли" авторақамлар харидоргир ҳарф ва рақамлар комбинацияси билан фарқ қилади. Масалан, (01) C 777 AB, (01) C 700 AB ёки (01) C 001 авторақамлар.
Энг фаол харидорлар — Тошкент ва Тошкент вилояти ҳайдовчилари бўлишди. Шунингдек, сотувлар вилоятларда ҳам фаол равишда давом этмоқда: хусусан, Қорақалпоғистон Республикаси, Жиззах, Бухоро, Самарқанд, Қашқадарё, Хоразм, Андижон, Фарғона вилоятларида онлайн-аукционлар ўтказилди.
Савдо аукцион жараёнида харидорлар исталган миқдорда буюрмалар бериши мумкин. Таклиф этилаётган нарх энг охирги нархдан баланд бўлиши керак. Автомашина рақамларини сотилишидан тушган маблағлар давлат бюждетига тушади.
