ТОШКЕНТ, 9 окт – Sputnik. “Озиқ-овқат хавфсизлигини таъминлашнинг қўшимча чора-тадбирлари тўғрисида”ги президент қарори лойиҳаси умумий муҳокамага қўйилди.
Лойиҳада Қишлоқ хўжалиги вазирлиги тузилмасида давлат-хусусий шериклик асосида Органик қишлоқ хўжалиги ва озиқ-овқат маҳсулотларини ишлаб чиқаришга ихтисослаштирилган агрокластер (Органик агрокластер) ташкил этиш тўғрисидаги таклифига розилик бериш белгиланган.
Ҳужжатда ёзилишича, органик агрокластернинг асосий вазифалари:
- қишлоқ хўжалиги маҳсулотларини органик усулда етиштиришни ташкил этиш;
- органик сифатга эга бўлган озиқ-овқат маҳсулотларини ишлаб чиқаришни йўлга қўйиш;
- органик маҳсулотларни ишлаб чиқишда илм-фан ютуқлари ва замонавий технологиялардан кенг фойдаланиш;
- органик маҳсулотлар ишлаб чиқариш (етиштириш, сақлаш, қайта ишлаш)да ер майдонлари сув ресурсларида оқилона фойдаланишда автоматлаштирилган ва интеллектуал технологияларни кенг қўллаш;
- органик маҳсулотлар учун самарали технологияларни қўллаш бўйича меъёрий ва услубий қўлланмалар ишлаб чиқиш ва оммалаштириш;
- органик маҳсулотлар ишлаб чиқаришни ташкил этиш ва илғор техника ва технологиялардан самарали фойдаланиш йўналишида кадрлар тайёрлаш, қайта тайёрлаш ва малакасини ошириш;
- қишлок хўжалигининг ресурстежамкор хорижий техника ва технологияларни келтириш, дала тажрибалари ва лаборатория синовлари ўтказиш ҳамда унинг ижобий натижаларини кенг жорий этишга тавсия этиш;
- анаънавий, ноанаънавий экин турларини ва уларни қайта ишланган маҳсулотларини ўрганиш, уларни етиштиришни ва қайта ишлашни йўлга қўйиш.
“2020-2021 ўқув йилидан бошлаб Тошкент давлат аграр университетида “Ограник қишлоқ хўжалиги ва органик маҳсулот етиштириш” бўйича бакалавриат таълим йўналишлари ва магистратура мутахассисликларини ташкил этсин”, - дейилган ҳужжатда.
