ТОШКЕНТ, 21 фев – Sputnik. Ўзбекистон бош прокурори ўринбосари Светлана Артикова айтишига қараганда республикадаги прокурорларнинг аксарияти одамларга яхши муносабатда. Халқаро пресс-клуб маълумотига асосан.
Шахсан айта оламан, 90% прокурорларнинг муомаласи яхши. Ишингиз тушиб борганингиздан, кетгунингизгача қўли кўксида хизматингизда туради. Тўғри, қолган 10% прокурорлар борки, бутун соҳага салбий таъсир қилмоқда, - дейди Артикова.
Ундан ташқари, бош прокурор ўринбосари ҳалоллик вакцинаси барча давлат хизматчиларига кераклиги ҳақида айтиб ўтди. Артиковага кўра, коррупция ҳолати давлат бюджети билан муносабатга киришиш жараёнида вужудга келиши мумкин.
Шунингдек, бош прокурор ўринбосари Ўзбекистон прокуратура тизимида муҳим ўзгаришлар кутилаётгани ҳақида ҳам гапирди. Хусусан, эски тартибга кўра прокурорлар фуқаролардан шикоят аризаси бўлмаса хам жиноят ишини ўрганишлари мумкин эди. Энди бўлса, фақат фуқародан шикоят аризаси бўлсагина жараёнга аралашиши мумкин бўладиган тартиб яратилмоқда, дейди Артикова.
