ТОШКЕНТ, 25 июн - Sputnik. Ўзбекистонда Озиқ-овқатлар таркибида ГМО миқдорини аниқлайдиган лабораториялар ташкил этилади. Бу ҳақда "Ўзстандарт" агентлиги АОКАда бўлиб ўтган брифингда хабар қилди.
"Жаҳон банки кредити асосида Бухоро ва Намангандаги "UzTest" қошидаги синов лабораторияларини модернизация қилиш бўйича амалий ишлар бошланди. Марказлар қошида янги йўналишдаги маҳсулотлар таркибидаги ГМО миқдорини аниқлаш лабораторияси ташкил этилади", - дейилган хабарда.
Халқаро эксперт (Латвиянинг БИОР институти вакили) ўтказган ўрганиш натижасида, Республика ҳамда Андижон, Бухоро, Навоий, Наманган, Самарқанд, Қашқадарё, Хоразм марказларидаги озиқ-овқат ва қишлоқ хўжалиги махсулотларини синаш лабораториялари модернизациялаш кўзда тутилган. Лойиҳанинг умумий суммаси 11,6 млн. АҚШ долларини ташкил этди.
Бугунги кунда Ўзбекистонда қишлоқ хўжалиги соҳасида 1276 та стандарт амал қилмоқда. Улардан шундан 893 таси халқаро стандартларга уйғунлашган стандартлар, яна 309 таси халқаро ва 6 таси хорижий давлатларнинг стандартларидир.
Озиқ-овқат саноатига тегишли 3509 та стандарт мавжуд. Улардан 2140 таси халқаро стандартларга уйғунлашган ва амалга киритилган.
