ТОШКЕНТ, 1 сен — Sputnik. Ўзбекистон ва Беларусь икки давлат ўртасидаги мунтазам парвозларни тиклаш ниятида. Бу ҳақда Беларусь Транспорт вазирлиги матбуот хизмати хабар қилмоқда.
Хабарда ёзилишича, Беларусь Транспорт ва коммуникация вазирлиги авиация бўйича департаменти директори Артём Сикорский Ўзбекистон транспорт вазири ўринбосари Жасурбек Чориев билан музокаларлар ўтказган.
Музокаралар якунига кўра Минск - Тошкент - Минск мунтазам авиарейсларини қайта тиклаш борасида келишувга эришилди.
Рейсларни икки давлатнинг миллий авиаташувчиси “Ўзбекистон ҳаво йўллари” ва “Белавиа” амалга оширади.
Бундан ташқари, музокаралар чоғида иккала давлатда карантин чораларини ҳисобга олган ҳолда парвозлар сони ва йўловчиларни ташиш шартлари билан боғлиқ аниқ масалалар кўриб чиқилди.
Шунингдек, томонлар фуқаро авиацияси соҳасида икки томонлама ҳамкорликнинг бугунги ҳолати ва уни янада мустаҳкамлаш истиқболларини ҳамда пандемия оқибатларини камайтиришга қаратилган чора-тадбирларни муҳокама қилди.
Эслатиб ўтамиз, аввалроқ Ўзбекистон ҳукумати айни вақтда Туркия, БАА, Беларусь ва Қозоғистон Республикаси билан сентябрь ойидан бошлаб, босқичма-босқич равишда мунтазам авиа қатновларни тиклаш масаласини кўриб чиқаётгани хабар қилинган эди.
