ТОШКЕНТ, 30 авг — Sputnik. Футбол бўйича Ўзбекистон миллий терма жамоаси 31 август куни ЖЧ-2018 турнирига саралаш босқичи 9-турида Хитойга қарши баҳс ўтказади.
Ушбу баҳс Ўзбекистон термасининг жаҳон чемпионати йўлидаги кейинги тақдирига аниқлик киритиб берадиган ҳал қилувчи ўйин ҳисобланади. Сабаби, агарда ўзбекистонликлар мазкур учрашувда ғалаба қозонадиган бўлишса, кейинги баҳс 5 сентябр куни Ўзбекистонда Жанубий Кореяга қарши бўлиб ўтади. Майдондаги мухлисларнинг қўллаб-қувватлови ва ғалабадан кейинги кўтаринки кайфият ўзбекистонлик футболчиларга қўшимча куч бағишлаши мумкин.
Ўзбекистон терма жамоаси Хитой билан жами 11 марта тўқнаш келган. Ушбу тўқнашувларнинг 6тасида ўзбекистонликлар ғалаба қозонишган, 4тасида хитойликлар ғолиб бўлишган ва бир ўйин дуранг билан якунланган. Тўплар нисбати Ўзбекистон термаси фойдасига 18:13.
Индивидуал жиҳатдан олиб қараганда, Ўзбекистон терма жамоаси футболчилари хитойлик футболчилардан маҳорат бобида устунликка эга. Аммо мураббийлар борасида бундай дейиш қийин. Чунки Хитойга италиялик таниқли мураббий Марчелло Липпи устозлик қилади. У турли йилларда мураббий сифатида Италия чемпионлиги, Италия кубоги ва суперкубоги, Чемпионлар Лигаси ва УЕФА суперкубогини қўлга киритган. 2006 йилда Италия терма жамоасини жаҳон чемпиони қилган.
2012 йилда Хитойнинг "Гуанчжоу Эвергранд" клубига мураббийлик қила бошлаган Липпи 2012, 2013, 2014 йилларда жамоани Хитой чемпионига айлантирган ва Хитой кубоги ҳамда ОФК Чемпионлар Лигаси совринларига эга чиққан. 2012 йил октябридан Хитой терма жамоасига мураббийлик қилиб келмоқда.
Ушбу мураббий олдида илк бор терма жамоа рулини ўз бошқарувига олган Самвел Бабаяннинг ютуқлари камтарона. Бабаян ҳозирча "Пахтакор"ни Ўзбекистон чемпиони қилганлиги билан мақтаниши мумкин холос.
Эртанги ўйин кўп жиҳатдан мураббийлар савиясини кўрсатиб берадиган, тактик жиҳатдан устун мураббий ғалаба қозонадиган баҳс бўлади. Ўзбекистонлик футболчиларнинг маҳоратига Бабаяннинг тўғри кўрсатма ва тактик режаси ҳамоҳанг бўлса, Ўзбекистон терма жамоаси эртага албатта ғалаба қозонади.
Бабаян хитойликларга қарши ўйинга 24 нафар футболчини жалб қилди. Улар қуйидагилар: дарвозабонлар — Александр Лобанов ("Пахтакор"), Игнатий Нестеров ("Локомотив" Тошкент), Никита Рибкин ("Қўқон-1912").
Ҳимоячилар — Фаррух Сайфиев ("Насаф"), Виталий Денисов ("Локомотив" Москва, Россия), Анзур Исмоилов ("Чанчунь Ятай", Хитой), Шерзод Аъзамов ("Пахтакор"), Егор Кримец ("Бейжинг Гоань", Хитой), Акмал Шораҳмедов ("Насаф"), Ислом Тўхтахўжаев ("Локомотив" Тошкент).
Ярим ҳимоячилар — Сервер Жепаров ("Истиқлол" Теҳрон, Эрон), Жалолиддин Машарипов ("Локомотив" Тошкент), Элдор Шомуродов ("Ростов", Россия), Одил Аҳмедов ("Шанхай СИПГ", Хитой), Фозил Мусаев ("Жубило Ивата", Япония), Азиз Ҳайдаров ("Ажман", БАА), Отабек Шукуров ("Бунёдкор"), Жамшид Искандеров ("Пахтакор"), Сардор Рашидов ("Ал-Жазира", БАА), Марат Бикмаев ("Локомотив" Тошкент), Сардор Мирзаев ("Локомотив", Тошкент).
Ҳужумчилар: Темурхўжа Абдухолиқов ("Ас-Сайлия", Қатар), Игорь Сергеев ("Пахтакор"), Александр Гейнрих ("Ордабаси", Қозоғистон).
Хитой — Ўзбекистон учрашув эртага Тошкент вақти билан соат 17:00 да бошланади.
Мазкур ўйинни Шри-Ланка мамлакати ҳакамлари бошқариб боради. Бош ҳакам вазифасини Кришанта Дилан Перера Хеттиканканамге бажаради. Унга қанотларда Приянга Намал Паллия Гуруге ҳамда Палита Парракрама Дение Гедара ёрдам беради.
Захира ҳаками вазифаси Куттиаппа Ражарантам Прашант Ражакришнага юклатилди. БАА вакили Али Муҳаммад Бужсаим Шри-ланкалик ҳакамлар ишига баҳо беради. Ўйин комиссари — Хоай Ан Ли (Вьетнам).
"А" гуруҳи етакчилари Эрон ва Жанубий Корея терма жамоалари ўртасидаги ўйин параллель равишда бошланади.
Эрон 8 ўйиндан сўнг 20 очко тўплаб мундиал йўлланмасини нақд қилиб қўйган, Корея эса 13 очко билан 2-ўриндан жой олган. Ўзбекистон терма жамоаси 12 очко тўплаган ҳолда 3-ўринда турибди.
Агарда жадвалнинг охирги ўрнида жойлашган Хитойни эртага енгиш насиб этса, Ўзбекистоннинг жаҳон чемпионатига чиқиш эҳтимоли анча ошади.
Эртанги ўйинда Ўзбекистон термаси барча мухлислар ишончини оқлайди деган ният билан ўзбекистонлик футболчиларга омад тилаймиз.
