ТОШКЕНТ, 6 сен — Sputnik. Александр Гейнрих терма жамоадаги фаолиятини якунлади, деб хабар қилди Ўзбекистон 24 нашри championat.asiaга таянган ҳолда.
Хабарда айтилишича, футбол бўйича Ўзбекистон ва Жанубий Корея терма жамоалари ўртасидаги ўйиндан сўнг ҳужумчи Александр Гейнрих терма жамоадаги фаолиятига якун ясашга қарор қилган.
Ҳужумчи ўйиндан сўнг автобусга чиқаётганида "Мен миллий терма жамоадаги фаолиятимни тугатдим. Бугунги ўйин мен учун охиргиси бўлди. Барча ишқибозларга раҳмат айтаман", деган.
Эслатиб ўтамиз, кеча ўтказилган ўйинда Ўзбекистон терма жамоаси Жанубий Корея билан дурранг натижага ўйнаб жаҳон чемпионати йўлланмасидан қуруқ қолди.