ТОШКЕНТ, 5 фев — Sputnik. 2020–2023 йилларда давлат-хусусий шериклик шартлари асосида ҳудудларда енгил конструкцияли ёпиқ муз қопламали майдонлар қурилади. Бу Ўзбекистон президентининг “Қишки спорт турларини ривожлантириш чора-тадбирлари тўғрисида”ги қарорида белгиланган.
Қарор билан тасдиқланган дастурга кўра, 2020–2023 йилларда қишки спорт турлари ривожлантирилади, халқаро спорт мусобақаларида Ўзбекистон спортчиларининг муносиб иштироки таъминланади.
Шунингдек, “Ўзкўргазмасавдо” биноси базасида қишки спорт турлари саналган фигурали учиш, шорт-трек, кёрлинг бўйича мусобақалар ўтказиш, кўргазмалар ва форумлар ўтказишга мўлжалланган замонавий муз саройи ташкил этилади.
2020–2023 йилларда давлат-хусусий шериклик шартлари асосида ҳудудларда енгил конструкцияли ёпиқ муз қопламали майдонлар қурилади.
Ўзбекистон давлат жисмоний тарбия ва спорт университетида эса 2020-2021 ўқув йилидан бошлаб қишки спорт турлари кафедраси ташкил этилади.
Бундан ташқари 2023 йил 1 январга қадар Қишки спорт турлари ассоциацияси, Ўзбекистон хоккей федерацияси, уларнинг ҳудудий бўлинмалари, қишки спорт турлари бўйича профессионал клублари ва нодавлат болалар спорт мактаблари мол-мулк ҳамда бир қанча солиқ ва божхона тўловларидан озод этилади.
