ТОШКЕНТ, 6 сен — Sputnik. Россия президенти Владимир Путин Ўзбекистоннинг биринчи президенти Ислом Каримов қабрига гул қўйди.
Путин Ўзбекистон Бош вазири билан биргаликда Ислом Каримовни хотирлади. Каримовнинг қабри олдида тиз чўккан ҳолда Путин қизил атиргулларни қабр устига қўйди.
Каримовнинг қабри узра гулчамбар қўйган Владимир Путин марҳумнинг беваси — Татьяна Каримова ва унинг кенжа қизи Лола Каримова-Тиллаевага чуқур ҳамдардлик билдирди. Россия президенти ва Ислом Каримовнинг қариндошлари ўртасидаги суҳбат матбуот вакиллари иштирокисиз кечди.
Ўзбекистон ҳукумати ва парламенти жума куни кечқурун мамлакатнинг биринчи президенти Ислом Каримов вафот этгани ҳақида хабар қилган эди. 3 сентябрдан бошлаб Ўзбекистонда 3 кунлик мотам эълон қилинди. Ислом Каримов шанба куни, ўз васиятига кўра, Самарқанддаги Шоҳи-Зинда қабристонида мусулмон урф-одатларига кўра дафн этилди.
Ислом Каримовнинг вафотидан кейин мамлакат конститутциясига мувофиқ, Ўзбекистон президенти вазифасини бажарувчи этиб Ўзбекистон Республикаси парламентининг юқори палатаси (Сенат) Раиси Нигматулла Йўлдошев тайинланди.
Шу билан бирга, Ўзбекистон Вазирлар Маҳкамаси Каримовнинг дафн маросимини ташкиллаштириш бўйича комиссияга Ўзбекистон Бош вазири Шавкат Мирзиёев раҳбарлик қилишини айтиб ўтган эди.
Россия етакчиси ёрдамчиси Юрий Ушаков "Россия президенти ҳамдардлик ва таъзия билдириш учун Самарқандга сафар қилганини" айтиб ўтди.