Келиб чиқиши номаълум улкан "ахлат ороли" Таиланд курортларига қараб сузмоқда

ТОШКЕНТ, 10 фев — Sputnik. Балиқчилар томонидан Таиланд қирғоқлари яқинида аниқланган улкан "ахлат ороли"нинг дайвер(денгиз тубига шўнғиш билан шуғулланувчи ҳаваскорлар)нинг энг севимли жойи бўлмиш Талу оролига етиб келишига 6 километрча масофа қолган, деб хабар қилди жума куни Таиланд ҳарбий-денгиз округи қўмондони вице-адмирал Сурасак Метхайпха.

"Ахлат ороли" илк бор бир ҳафта муқаддам аниқланган: балиқчилар капитани уни ўзининг смартфонига суратга олган ва ушбу суратни ижтимоий тармоқлар орқали тарқатиб юборган. Ана шундан сўнг Таиланд миллий оммавий ахборот воситалари Талу ороли ва Хуа Хин ҳамда Ча-Ам курорт оролларига аста-секин яқинлашиб келаётган чиқиндилар уюми ҳақида бонг уришни бошлаган. 

Балиқчилар ва ҳарбийларга кўра ахлатнинг асосий қисмини елимдан ишланган пакетлар ва пластикдан ясалган бошқа рўзғор буюмлари ташкил этади.

Айни вақтда Таиланд Ҳарбий-денгиз кучлари денгиз полицияси ва ушбу соҳилга яқин провинциялар маъмурияти ходимлари билан ҳамкорликда сувдан ахлатни ажратиб олиш ва уни йўқ қилиш борасида операцияга тайёргарлик кўришмоқда.

"Ахлат ороли"нинг келиб чиқиш тарихи ҳозирча номаълумлигича қолмоқда, деб хабар қилган РИА Новости.