Миллионер бўлишни истовчилар товуқ боқсин - Меҳнат вазирлиги тавсияси

ТОШКЕНТ, 27 фев — Sputnik. Mehnat.uz сайтининг Facebook ижтимоий тармоғидаги саҳифасида товуқ ва лимон хўжалиги бўйича тавсияномалар берилди.

"Парранда — етти хазинанинг бири. Бу хазина хонадонингиз бир бурчагидан туриб, оилангиз бюджетига яхшигина даромад келтириши мумкинлигини биласизми? Унга эришиш учун эса сиздан хоҳиш ва ҳаракатчанлик талаб этилади, холос", дейилади ролик аввалида.

Роликка кўра, тухум туғадиган товуқлар орасида мутахассислар Ломанн, Декалп, Хай-лайн ва Радонит-3 зотларини боқишни тавсия этади.

Ҳозирда Ўзбекистон бозорларидаги тухумларнинг аксарият қисми Ломанн зотлари улушига тўғри келар экан. 

Ушбу зотли паррандалардан уй шароитида парваришлаб, 1 йилда 250-270 донагача тухум олинади, деб хабар қилинган роликда.

"Паррандалар қўлбола катакларда ёки ерда боқилади. Улар асосан қуруқ аралаш емлар билан озиқлантирилади. Ўзбекистон шароитида 1 товуқ боқиш учун 1 йилда ўртача 50 кг аралаш ем керак бўлади. Сиз ўз уйингизда 100та товуқдан 1 йилда 10 миллион сўмдан зиёд соф даромад қилишингиз мумкин", — дейилган видеода.

Қандай қилиб миллионлаб соф даромад олиш мумкин, деяпсизми?

"Юзта товуқдан кунига 60-70та тухум олинади. Бир дона тухум нархи ўртача 450-500 сўмни ташкил этса, кунига 30-35 минг сўмгача даромад қилиш мумкин, дегани. Бу бир ойда 1 миллион сўмдан зиёд, бир йилда эса 12 миллион сўмни ташкил этади" дея изоҳ берилади роликда.