ТОШКЕНТ, 29 авг – Sputnik. Тошкентдаги Riviera савдо мажмуасида содир бўлган ҳодиса юзасидан жиноий иш қўзғатилди. Бу ҳақда Бош прокуратура матбуот хизмати хабар қилди.
“Мазкур ҳолат юзасидан Тошкент шаҳар прокуратураси томонидан тегишли моддалар билан жиноят иши қўзғатилиб, дастлабки тергов ҳаракатлари олиб борилмоқда”, - дейилади хабарда.
Эслатиб ўтамиз, Олмазор тумани, Нурафшон кўчасида қурилаётган савдо мажумаси биносининг метал билан ёпилган том қисми қулаб тушиши оқибатида қурилиш-таъмирлаш ишларини бажараётган 4 нафар ишчилар оғир турдаги тан жароҳатлари олиб, вафот этган. 2 нафар ишчилар эса ҳодиса жойида бўлган фуқароларнинг кўмаги остида шифохонага ётқизилган.
ССВ хабарига кўра, жароҳатланганлар зудлик билан текширувлардан ўтказилиб, белгиланган тартибда шошилинч тиббий ёрдам кўрсатилмоқда. Жумладан, О.Ш. ўнг тавон суягининг синиши ташхиси билан ўрта оғир аҳволда, З.Р. эса аралаш травма, чап елка суягининг синиши ташхиси билан ётқизилган.
