ТОШКЕНТ, 26 ноя - Sputnik. Тошкент ИИББ барча ҳайдовчилардан транспорт воситасини бошқариш вақтида мураккаб об-ҳаво шароитини ҳисобга олишларини, зарурат бўлмаганда тунги вақтларда ҳаракатланмасликни сўрамоқда.
"Довон йўлида ҳаракатланадиган ҳар қандай транспорт воситаси энг аввало техник соз бўлиши лозим. Бунда, шиналар ва иситиш мосламаси, рул бошқаруви ҳамда тормоз тизимларига алоҳида эътибор берилиши зарур. Довон томон йўлга отланган ҳайдовчилардан ўзлари ва ўзгаларнинг хавфсизлиги учун ушбу қоидаларни унутмасликларини эслатиб ўтамиз. Шундагина тоғли йўллар хатарсиз ва равон бўлади", - дейилади хабарда.
ИИББ хабарида қайд этилишича, сирпаниб тепаликка чиқа олмаётган аксарият автомобиллар қиш мавсумга тайёрланмаган. Кўпчилик ҳайдовчилар ёзги шиналарни қишкисига алмаштиришмаган. Айримларининг шиналари хизмат қилиш муддатини ўтаб бўлган. Бу эса тоғли йўлда, қор ёғганда маълум қийинчиликларни, муаммоларни келтириб чиқаради.
